OFFICE OF THE DIRECTOR,

HEALTH SERVICES : MINECO AIZAWL

MASS EDUCATION & MEDIA SECTION

PRESS HANDOUT

DATED AIZAWL : THE 21^TH FEBRUARY 2025

PRESS HANDOUT NO: 6/3/2025

World Hearing Day : 3^rd March, 2025

        Ri Hriatna Ni hi vawiin March ni 3, 2025 hian khawvel pumpuiah a vawi 18 na atan hun hman a lo ni leh ta a, Mizoram ah pawh a vawi 10 na atan Directorate of Hospital & Medical Education Auditorium MINECO ah he hun hi hman a ni.

    Dr. S.R. Ngurchamliana, Additional Director, DHME chuan he hun hi kaihruaiin, he hun a khuallian Dr. Eric Zomawia, Director Hospital & Medical Education chuan thawktute an inhmukhawm thei hi a lawmawm a ti a. Tin, Redeem Garden , Durtlang leh Ephata Special School, Kulikawn te chu he hun an hmang tur a an tel thei hi a lawm a. Mipuite bengri hriatna tha lo kan tam hle a, Social Awareness a la that tawk loh zia sawiin, Mipuite heng kan District Hospital-a kan audiologist te hmangtaikai turin a chah bawk.

    Dr. Lalthanmawii Khalthang, Cunsultant, NPPCD chuan Presentation kal tlangin Overview of NPPCD hun a hmang a, bengri hriatna kawnga hmalakna leh hriattur pawimawh tak tak te a tar lang bawk a ni.

    Dr. Lalhmingmawii, MS ENT, Asso. Professor,  Zoram Medical College & Hospital chuan tun kum World Hearing Day atan thupui " Changing mindsets - Empower yourself to make Ear & Hearing Care a reality for All" tih thupui hmangin thu a sawi bawk a ni.

      Dr. Robert L Khawlhring, State Nodal Officer , NPPCD chuan he hun hmang tura kal zawng zawng te hnenah Vote of Thanks sawiina hun hmangin, he hun hi a khar a ni.

        World Hearing Day hi kum 2007 atang khan kum tin hman a lo ni tawh thin a. Geneva Headquarter in a rel ang in he Ni hian a tum ber chu  Bengngawng te harsatna hriatthiam pui tur leh bengngawnna ti tlem tura mipui te hnena zirtirna zau zawk a theh darh hi a ni.  Hei bakah beng natna a hma thei ang bera hmuh chhuah a, enkawl hma hian bengngawnna a thlen tur nasa takin a veng thei a ni.

       WHO in a zir chianna ah Bengngawnna hi kan thil hriatna 5 (sensory organs)  zinga piansualna ah a tam ber a ni a. Tunah hian khawvel pum pui ah mihring tluklehdingawn 1.5 (1.5 billion) vel hian ri hriatna chaklo an nei a, heng zinga maktaduai 430 te chu an beng a ngawng a, tun ang zela kan kal chho anih chuan kum 2050 ah chuan mihring 10 ah 1 zel hi an beng a ngawng dawn a chhut a ni. Hetiang anih avang hian kan beng hi kan enkawl uluk a ngaiin bengngawnna thlentu hrang hrang lakah kan in ven fimkhur a ngai hle a. Beng natna chi hrang hrang bakah damdawi beng ri hriatna chaklo thlen thei lakah te leh Ri bengchheng nasa lakah te kan inthiar fihlim a pawimawh hle a ni.

      He mi kawnga hma la tur hian  National Programme for Prevention and Control of Deafness (NPPCD) chu kum 2014, August thla atang khan Mizoramah pawh National Health Mission hnuaiah  din tan a ni a. Tun April 2024  atanga January 2025 thlenga record in a tarlan danin Mizoram chhungah hian Bengngawng mi 39911 en niin beng natna nei mi 14345 en an ni tawh a, investigation mi 5983 tih tawh an ni bawk. Bengdar hi mi 255 hnenah pek niin mi 3319 chu bengdar dawng turin refer an ni bawk a ni. Hemi kawngah hian RBSK (Rashtriya Bal Swasthya Karyakram), Ephatha Society te, Ephatha Special School leh Redeem Garden te thawhpui an ni a. Hei bakah hian NILD - NERC (National Institute for Locomotor Disorder - North Eastern Regional Council), ALIMCO leh AYJNISHD(D), Bhubaneshwar te nen bengdar sem kawngah hian an thawk ho mek bawk a ni.